Nola eragiten du alkoholak gidatzean?
2020. urteko erregistroen arabera, 15etik 29 urtera bitarteko nafar gazteen heriotza-zergati nagusietako bat trafiko istripuak izan dira. Alkoholaren eta gidatzearen arteko konbinazioa oso da garrantzitsua heriotza horietan.
Alkoholak eragindako trafiko-istripuengatiko heriotzen artean, % 8 18tik 24 urte bitarteko gazteenak dira, Toxikologiaren eta Auzitegiko Zientzien Institutu Nazionalaren datuen arabera. Eta heriotzen % 21, 25etik 34 urte bitarteko gazteenak, nagusiki gizonezkoak.
Gai honetaz hitz egitean, ohikoa da Edan baduzu...ez gidatu lema gogora ekartzea, Trafikoko Zuzendaritza Nagusiak 80ko hamarkadan egin zuen kanpainako hura. Batetik bestera mugitzeko ibilgailuak aldatu badira ere (autoa, motoa, bizikleta, patinetea, hoverboarda...), publizitateak eboluzionatu badu ere, mezuak indarrean dirau.
Zergatik? Alkoholak gidatzean dituen ondorioetako batzuk hementxe errepasatuko ditugu:
Alkoholaren ondorioak gidatzean
Alkoholak eragin handia du erabakiak hartzeko tenorean, eta erabakiak hartzea oso da garrantzitsua zirkulazioan segurtasuna bermatu nahi badugu. Hauek dira ondorioetako batzuk:
| Alkoholaren ondorioak gidatzean |
|---|
| Nekea |
| Koordinazio psikomotor eskasa |
| Argitasunak itsualdia errazago eragiten du |
| Zuhurtziagabekeriaz jokatzea |
| Errepideari arreta gutxiago jartzea |
| Erreakzionatzeko denbora gehiago behar izatea, espero gabeko gertaeren eta beste egoera batzuen aurrean |
Autoa, motoa, bizikleta… hartu behar duzunean, edateko asmoa baduzu, zuri dagokizu hori baloratzea eta arriskurik ez hartzea erabakitzea. Hausnarketa hori zure buruaren mesedetan egiten duzu, bai eta besteen mesedetan ere.
Honako proposamenak lagungarriak izan daitezke:
- Txangoa planifikatzea. Erabakitzea nola joan eta etorri nahi duzun, alkoholik edan behar duzun, bakarrik edo taldean joan behar duzun...
- Saiatu ateratzen etxera oinez itzultzeko moduko distantziara dauden eremu eta lekuetara.
- Erabili garraio publikoa (autobusa edo taxia); aukera onak izan daitezke. Gazte anitzek erabiltzen dute Jaibusa programa, udal eta mankomunitate anitzek istripuei aurre egiteko abian jarri dutena.
- Autoa erabili behar baduzu, hobe da bat gidatzeaz arduratzea eta hark ez alkoholik ez bestelako drogarik ez hartzea, etxera onik itzultzeko. Hurrengoan beste baten txanda izanen da!
- Edanda dagoen lagunari gogoraraztea eta hura konbentzitzea ez dela gai zuek autoan modu seguruan eramateko.
- Ez zaiteztela sekula igo auto, moto... batean, baldin eta gidariak alkohola edan badu.
|
Argibide gehiago:
- “Drogak eta gidatzea: etengabeko arriskua” gida (gastelaniaz). Energycontrol.
- "Edan eta hala ere gidatzen du?" gida (gastelaniaz). Energycontrol.
- "Drogak eta gidatzea: etengabeko arriskua" bideoak sare sozialetan (gastelaniaz). Energycontrol.
- Alkohola eta gidatzea. Trafikoko Zuzendaritza Nagusia.
- Mugi zaitez alkoholik gabe! Trafikoko Zuzendaritza Nagusia.
