Nola ikasi emozioak kudeatzen

“Ezin dugu galarazi emozioek gure bizitzan duten eragina; baina badugu aukera haietaz ohartzeko eta haiek kudeatzeko errealitate mesedegarri bat sor diezaguten”

Elvira S. Muliterno, idazlea

Haserrearen, pozaren, beldurraren... erroak aztertzea eta ikusiz joatea zer dagoen hor, zer mugitzen den nire baitan, pistak eskaintzen dizkigu gure burua pixka bat hobeki ezagutzeko eta pertsona gisa garatzeko.

Emozioek estimuluei erantzuten diete. Adibidez, litekeena da:

• Arrisku baten aurrean, beldurra agertzea eta ihes egiteko joera izatea.
• Min baten aurrean, haserrea agertzea eta erasotzeko joera izatea.
• Galera baten aurrean, tristura agertzea eta isolatzeko joera izatea.
• Gogobetetasunaren aurrean, poza agertzea eta hori adierazteko joera izatea.

Sentimenduak identifikatzea, bai eta horien aurretik izaten ditugun pentsamenduak ere, ikustea ea gertatutakoaren araberakoak diren, ohartzea zein jokabide pizten dituzten eta pentsatzea nola aldatu daitezkeen; hori guztia ikasi egiten da, denbora eskaini behar zaio, eta esperimentatzeko “ausardia” izatea ere beharrezkoa da. Aholku hauek lagungarriak izan dakizkizuke.

Bost urrats zer sentitzen dugun jakiteko:

• Izena jartzea maila emozionalean eta fisikoan nabaritzen ari garen horri.
• Gure pentsamenduak harrapatzea, zerbait puzten ari ote garen jabetzeko.
• Identifikatzea zerk egiten digun kalte.
• Gure jokabideei buruz hausnartzea.
• Jabetzea ea gure jokabideek ihes egiteko/saihesteko estrategia diren.

Emozioak identifikatzen, antzematen eta maneiatzen jakinez gero, aldaketak egin ditzakegu; pentsamendu eta sentimendu ezkorren ordez baikorrak hartu, eta aurrera segi.

Nola laguntzen digute emozioek?

• Egoera ebaluatzen laguntzen digute.
• Adierazten digute ea zerbait gure ongizaterako garrantzitsua den.
• Seinaleak dira.
• Zaintzen dute ea nola dauden gure harremanak.
• Gure barne-egoerari buruzko informazioa eta gure desirak adierazten dizkiote gure ingurune hurbileneko jendeari.
• Ikaskuntza eta oroimena areagotzen dituzte.
• Zeregin garrantzitsua dute erabakietan.